Vor guete emene Johr isch üsi Musiggsellschaft Koppigen vo ihrem sit Johre befründete Musigverein Kirchheim am Nekar ahgfrogt worde, für bi ihne e Schwyerobe dürezfüehre. Düre Ronni si mir ahgfrogt worde ob mir bi däm Projekt würdi mitmache u natürli si d’Bärgbrünneler für so öppis immer z’ha!
Für üs isch dr Ufwand nid eso gross usgfaue wie für d’Musig. Nacheme Probesunnti u dr Houptprob, isch dä ygstudiert Schwyzerobe unger dr Leitig vom Beat am Konzärt ahfangs Mai im Oeschberg düregfüehrt worde.
So, itz si mir bereit für uf das Kirchheim.
Am Samschti Morge dr 18. Mai si mir am Morge am Sächsi mit zwe Care i Richtig Dütschland gstartet.
Mir, das si: d’Musiggsellschaft Choppige, dr Alphornbläser Sämi Wäfler, dr Fahneschwinger Mäthu Wüthrich, d’Eggiwilergiele mit de Örgeli u Zubehör, d’Wally Schneider u mir Bärgbrünneler.
Nach ere glungnige u ufgsteute Fahrt, si mir am eufi mit Getränk u Wurscht vom Musigverein Kirchheim härzlech empfange worde. Nähr heissts «los»: Ungerkunft bezieh, Yrichte, Tonprob, u Ynischte uf dr Bühni. Dr Saal isch vo de Düütsche bereits wunderbar schwyzerisch dekoriert gsi.
Ab de haubi sächsi sie die 300 Bsuecher nahdis nah ytroffe u am Achti hei mir üses Konzärt mit überus passende Schwyzertön gstartet. D’Begeischterig u d’Fröid isch riesig gsi bi de Zuehörer. Vorauem ou nachem grossen Finale zämä mitem MV Kirchheim. Immer wieder si sie ufgstange u hei Zuegab verlangt.
Es isch e unvergässleche Obe worde u dr Gümpu aus DJ u d’Wally mit ihrer Power heis verstange d’Lüt no wyt id’Nacht bi Stimmig z’bhaute.
Am Sunnti Morge si mir miteme grosszügige Zmorebuffet verwöhnt worde. Nid bi aune isch dr Hunger glych gross gsi… u de hets bereits wieder gheisse Abschiednäh vo dene liebe Lüt wo üs so verwöhnt hei. Nacheme Abstächer id’Obschthalle u Wybärg, hei mir üsi Heireis i Ahgriff gnoh. Die isch de chly ruhiger usgfaue aus wo mir häregfahre si.
Mir Bärgbrünneler möchti üs vo Härze bir Musig Choppige bedanke! Sie hei üs das Erläbnis ermüglchet, wo üs no lang wird i gueter Erinnerig blybe u öppe es Schmunzle fürelockt. Es Danke ou a aui wo si mit derby gsi, es isch schön gsi öich dörfe lehre z’kenne. U es grosses Dankeschön am Musigverein Kirchheim, wo üs so mit offete Arme empfange u so guet zu üs gluegt hei.
SCHÖN ISCHES GSI!